2018an du abiapuntua “Inor ez da ilegala” proiektuak. Erreportaje bat egiteko asmoz, Bilboko kale-saltzaileen Mbolo Moye Doole elkartera jo zuen Argiak, migratzailez osatua, batez ere Senegaldik etorriak. Elkarrekin zerbait egiteko gogoa eta beharra piztu ziren, bai Argia eta bai Mbolo indartzeko, injustizia hizki larriz bistaratzeko. Eta aldarrikapena ardatz duten kamiseta grisak sortu genituen: “Inor ez da ilegala” euskaraz, “Amul been nit ku leegalul” wolofez.

Erosten duzun produktu bakoitzarekin Mbolo Moye Doole elkarteari egiten diozun ekarpen ekonomikoari esker, bost urtetan 35.000 eurotik gora jaso dute. Kale-saltzaileak eurak doaz erabakitzen diru hori nola kudeatu. Hasieran, kooperatiba sortzeko gorde zuten, baina traba trabaren atzetik, bertan behera geratu zen ideia; pandemian, dirua baliatu zuten erresistentzia-kutxa sortzeko; eta orain ere, beharrak agintzen du diru horrekin zer egin.

Alde ekonomikotik harago, mezu garbia zabaltzeko balio du ekimenak. Mboloko Bouba Dioufen hitzetan, “migratzaile izate hutsagatik, beltza izateagatik, zapalkuntza handia jasaten dugu eta mezu hori barreiatu dugu, proiektu borrokalaria da”.
Zoritxarrez, inoiz baino biziago jarraitzen du egitasmoak, eta horren lekuko dira migrazio politika krudela, sufritzen duten jazarpen legal eta instituzionala, diskurtso xenofobo, arrazista eta faxisten gorakada, Poliziaren gehiegikeriak…